- Адреса и телефоны
- 230005, г. Гродно, пер. Дзержинского, д. 15
- (+375 152) 43-35-53
- (+375 152) 48-16-40
- grodno@mchs.gov.by
Навагрудак. На асаблівым кантролі
Адна з су р’ёзных праблем неблаганадзейных грамадзян – злоўжыванне спіртнымі напіткамі. А вось іх жылыя памяшканні, іншымі словамі, – прытоны, пакідаюць жадаць лепшага і становяцца бядой для суседзяў. Нярэдка ў іх збіраюцца асобы, якія вядуць асацыяльны лад жыцця, хаваюцца ад праваахоўнікаў, ладзяць застоллі і начлежкі. Як паказвае статыстыка, аматары цыгарэт і алкаголю становяцца асноўнымі віноўнікамі і пажараў, бо не ў стане забяспечыць бяспеку пражывання. А тут дробязей не бывае.
Любая, нават самая нязначная няспраўнасць, можа абярнуцца трагедыяй. У чарговы рэйд, па так званых прытонах, мы накіраваліся сумесна з работнікамі Навагрудскага РАНС і РАУС.
Асноўныя задачы такіх рэйдаў – прафілактыка ўчынення злачынстваў і адміністрацыйных правапарушэнняў, нагадаць правілы пажарнай бяспекі ў індывідуальным жыллі, дзеянні пры ўзнікненні надзвычайнай сітуацыі, данесці да неблаганадзейных грамадзян разуменне таго, што іх лад жыцця нясе пагрозу не толькі ўласнай бяспецы, але і навакольным людзям. Падчас прафілактычных рэйдаў і мерапрыемстваў выратавальнікі і праваахоўнікі заклікаюць да пільнасці як саміх жыльцоў такіх кватэр, так і іх суседзяў, просяць своечасова прадухіліць непрадбачаныя сітуацыі.
Спісы ж такіх неблаганадзейных кватэр ёсць як у супрацоўнікаў міліцыі, так і ў выратавальнікаў. Яны пастаянна наведваюцца туды з мэтай кантролю і прафілактыкі. Наша рэйдавая група наведала прытоны, якія знаходзяцца ў горадзе і на тэрыторыі Уселюбскага сельвыканкама. У адных выпадках нас сустракалі дзверы на замку, у іншых – не адразу прапускалі ў сваё жыллё, адкуль несліся спецыфічныя пахі, антысанітарыя ў кожным доме. Спецыялісты нагадвалі пра шкоду алкаголю і пра тое, да якіх наступстваў можа прывесці гэтая згубная звычка, а таксама правяралі прыборы ўліку, патэнцыяльна небяспечнае абсталяванне, захаванне правілаў супрацьпажарнай бяспекі, цікавіліся, калі будзе пагашана запазычанасць па аказаных камунальных і іншых паслугах, папярэджвалі аб тым, што будзе ў адваротным выпадку.
Пры аглядзе жылля Пятра М. у в. Нізаўцы начальнік Навагрудскага райадзела МНС Дзмітрый Максімовіч адзначыў, што печ знаходзіцца ў аварыйным стане, відны пашкоджанні па ўсёй плошчы, печкавыя дзверцы не зачыняюцца, на прадтопачным лісце смецце. У доме няма электрычнасці, АПА не працуе, раскіданы недакуркі і запалкі, паўсюль валяюцца бутэлькі ад спіртных напіткаў, ложак ператварыўся ў шафу, усюды забруджана. Папярэджанне вынесена Пятру М. начальнікам РАНС. А ў самы бліжэйшы час прадстаўнікі адпаведных службаў зноў наведаюцца ў гэты дом з чарговай праверкай.
Па словах старышыні Уселюбскага сельвыканкама Івана Чарнэля, мужчына яшчэ не на пенсіі, нідзе не працуе, вядзе асацыяльны лад жыцця, у яго доме нярэдка збіраюцца «сябры», – аматары выпіць. Жыллё на асаблівым кантролі. Дом мужчыне дастаўся ў спадчыну. Раней недалёка жыла дачка, але год назад выехала ў суседні раён. Праўда, і яе лад жыцця не адрозніваецца ад бацькі. Частымі гасцямі ў яго доме бываюць людзі з суседніх вёсак, якія таксама вядуць асацыяльны лад жыцця.
Далей рэйдавая група на чале са старшынёй сельвыканкама і начальнікам РАНС накіравалася ў вёску Рахавец, дзе таксама пражывае некалькі неблаганадзейных грамадзян. Не засталі дома мы ні грамадзянку Ш., ні братоў С. Дамы былі на замку. Да іх таксама ў бліжэйшы час завітаюць у госці праваахоўнікі і выратавальнікі, бо мужчыны і жанчына стаяць на прафілактычным уліку ў міліцыі і ў выратавальнікаў да іх таксама ёсць пытанні.
У аг. Уселюб на парозе дома, у якім некалькі гадоў таму адбыўся пажар і падчас якога загінулі два чалавекі, нас сустрэла Наталля Ш. Жанчына пражывае ў доме з Яўгеніем Ж. – сынам загінулага гаспадара.
– Электрычнасць у доме адключана, а набліжаецца зіма, рана цямнее! Не думаеце, як будзеце зімаваць і як абаграваць сваё жыллё. Ужо холадна, а каб карыстацца печчу, вам трэба ачысціць ад сажы дымаход і паштукатурыць, пабяліць яго, навесці парадак у доме. І раю ўладкавацца на працу, зрабіць рамонт, – робіць заўвагі Дзмітрый Сяргеевіч. – Нагадваю: не курыце ў доме і абавязкова ўстанавіце АПА. Выправіце заўвагі – старшыня сельвыканкама патэлефануе, а мы прыедзем, праверым. У іншым выпадку будзеце плаціць штраф за невыкананне правіл пажарнай бяспекі. Вы павінны турбавацца самі пра сваё жыллё і жыццё, каб зноў не здарыўся пажар і не было такіх жа страшных наступстваў.
На наступны дзень мы далучыліся яшчэ да адной рэйдавай групы. Разам са старшым участковым інспектарам аддзела аховы правапарадку і прафілактыкі Навагрудскага РАУС Валянцінам Рагулем і інспектарам сектара прапаганды і ўзаемадзеяння з грамадскасцю РАНС Бажэнай Паляковай завіталі да навагрудчан, якія вядуць асацыяльны лад жыцця.
Прыватны дом па вул. Катоўскага – адзін з першых, куды мы заглянулі, бо ён на пільным кантролі. У доме пражывае з сужыцелем жанчына, якая пазбаўлена бацькоўскіх правоў, знаходзілася на лячэнні ў ЛПП, пастаяннага месца працы ў іх няма, працуюць на сезонных работах. Гаспадара Віктара К. дома не было, сужыцельніца Жанна А. адкрывае дзверы хутка, пры гэтым з парога папярэджвае, што да візіту чужых людзей яна была не гатова. У пакоях, сапраўды, беспарадак. Адзенне, абутак, посуд, гаспадарчы інвентар – усё раскідана па пакоях і разам з непрыбранымі пасцелямі і раскіданымі рэчамі, стварае непрыемнае ўражанне. Пры гэтым у інспектара не было магчымасці праверыць дымаход, аднак па стане печы відаць, што яна патрабуе рамонту ў самы бліжэйшы час. Па адпаведным паху адчувалася, што ў доме кураць. А пацвярджэнне таму – цэлы пакет недакуркаў ляжаў на печы.
– На першы раз вам робім заўвагу, на наступны раз прыйдзецца заплаціць немалы штраф, калі не выправіце ўсе заўвагі і будзеце курыць дома, – сказала інспектар Бажэна Палякова. – Абавязкова павінен быць спраўны АПА, навядзіце парадак у доме, нам абавязкова патрэбна праверыць стан дымахода.
Падобная сітуацыя была і па наступным адрасе. Дом па завулку Валчэцкага ўзяты на асаблівы кантроль. У жніўні тут было ўчынена цяжкае злачынства. Падчас распіцця алкагольных напіткаў паміж двума братамі Л., якія пражывалі ў доме ў грамадзяніна Івана Ш., узнікла сварка. У адносінах да аднаго з братоў Л. заведзена крымінальная справа.
Падчас наведвання ў доме знаходзіўся гаспадар, якому былі зроблены заўвагі па пажарнай бяспецы, утрыманні не ў належным стане печы, не працаваў АПА. Участковы інспектар яшчэ раз нагадаў мужчыне пра шкоду алкаголю і пра тое, да якіх наступстваў можа прывесці гэтая згубная звычка. Лепш знайсці працу і спыніць гулянкі, каб не трапіць у ЛПП.
– Участковыя інспектары, выратавальнікі частыя госці ў праблемных грамадзян. У падобных месцах застоллі нярэдка перарастаюць у скандалы і разборкі, завяршаюцца крадзяжамі маёмасці і грошай у «сяброў-сабутыльнікаў».
Падобныя рэйды – дзейсны метад працы, накіраваны на прафілактыку злачынстваў і правапарушэнняў, папярэджання пажараў і гібелі на іх. І далей такія мерапрыемствы будуць праводзіцца на пастаяннай аснове, бо галоўная мэта – захаваць жыцці людзей, папярэдзіць, дапамагчы выйсці з цяжкай сітуацыі, а для гэтага патрэбна толькі жаданне грамадзян, якія вядуць асацыяльны лад жыцця.
Па матэрыялах газеты «Новае Жыццё»