Дзятлава. Навучальны семінар для медыцынскіх работнікаў

Семінар “Рэвалюцыя ў галіне аховы працы і тэхнікі бяспекі: роля штучнага інтэлекту і цыфравізацыі на працоўным месцы” прайшоў у Дзятлаўскай цэнтральнай раённай бальніцы. Удзел у семінары прынялі галоўны спецыяліст упраўлення па працы, занятасці і сацыяльнай абароне райвыканкама Святлана Латушка, намеснік начальніка Дзятлаўскага райаддзела па надзвычайных сітуацыях Сяргей Кухарчык, галоўны дзяржаўны інспектар Навагрудскай інспекцыі працы Аляксандр Паўловіч, памочнік доктара-гігіеніста Дзятлаўскага райЦГЭ Марыя Шымчык.

– Пытанні бяспекі заўжды будуць актуальнымі. Ад няшчасных выпадкаў на вытворчасці атрымлівае траўмы і гіне вялікая колькасць людзей. Іх не трэба ўтойваць, а наадварот неабходна расказваць, каб гэта было ўрокам для іншых, – адзначыла Святлана Латушка – Такія новыя тэхналогіі, як штучны інтэлект і цыфравізацыя на працоўным месцы садзейнічаюць прынцыпам арганізацыі бяспечных умоваў. Варта памятаць, што інструкцыі па ахове працы важныя, неабходна праводзіць не фармальныя інструктажы, а разам перачытваць, абмяркоўваць з калектывам, тады гэта будзе больш дзейсна.

Захаванне патрабаванняў пажарнай бяспекі ўсімі супрацоўнікамі арганізацыі – ключавы аспект забеспячэння захаванасці жыцця і здароўя на вытворчасці. Намеснік начальніка райаддзела Сяргей Кухарчык падкрэсліў важнасць выканання правілаў паводзін у выпадку пажару і ўмення выкарыстоўваць сродкі пажаратушэння.

Прадстаўнік выратавальнага ведамства зазначыў неабходнасць дакладнага разумення алгарытму дзеянняў у выпадку ўзнікнення пажару.

– У раеннай бальніцы знаходзіцца вялікая колькасць людзей, якія патрабуюць асаблівай увагі і дапамогі ў экстранай сітуацыі, – падкрэсліў намеснік начальніка райаддзела – Таму вельмі важна, каб кожны супрацоўнік ведаў алгарытм дзеянняў пры пажары і ўмеў аператыўна і граматна прымяняць першасныя сродкі пажаратушэння. Ад зладжанасці і выразнасці дзеянняў персаналу залежыць жыццё і здароўе пацыентаў.