Смаргонь. Каб дом быў бяспечным

На Смаргоншчыне актыўна праходзіць інфармацыйная кампанія МНС, прысвечаная павышэнню дасведчанасці насельніцтва аб важнасці выкарыстання аўтаномных пажарных апавяшчальнікаў. На днях работнікі райаддзела правялі шэраг мерапрыемстваў у жылым сектары. На гэты раз фокус увагі выратавальнікаў і спецыялістаў сацыяльнай службы накіраваны на домаўладанні ў аддаленых вёсках, дзе пражываюць адзінокія грамадзяне.

Мэта наведвання не толькі абследаванне дамоў і жывая размова, але і практычная дапамога, і дзейсныя меры па павышэнні ўзроўню бяспекі – устаноўка аўтаномных пажарных апавяшчальнікаў. Спонсарскую дапамогу аказаў Белдзяржстрах: выдзелена 67 АПА для тых гаспадароў, хто застрахаваў свае дамы ў гэтай страхавой кампаніі.

– Апавяшчальнік – гэта самы даступны сродак, які пры першым з'яўленні дыму апавясціць аб небяспецы. Кошт апавяшчальніка, а гэта крыху больш за 20 рублёў, непараўнальны з цаной тых наступстваў, да якіх прыводзяць пажары, знішчаючы нажытую гадамі маёмасць, – канстатавалі выратавальнікі.

Вяскоўцам нагадалі нумары тэлефонаў службаў экстранага рэагавання, расказалі аб існуючай абстаноўцы з пажарамі ў раёне і Гродзенскай вобласці, агучылі асноўныя прычыны вогненных бед, прывёўшы рэальныя жыццёвыя прыклады.

З грамадзянамі работнікі МНС правялі прафілактычныя гутаркі аб выкананні правілаў пры развядзенні вогнішчаў, паколькі нават невялікі агонь можа стаць прычынай буйнога пажару, асабліва ў ветранае надвор'е.

З асаблівым акцэнтам гучала актуальнае пытанне важнасці захавання мер бяспекі пры наведванні лясных масіваў.

– Перад выхадам у лес абавязкова паведамляйце блізкім аб месцы, куды вы накіроўваецеся, бярыце з сабой зараджаныя мабільныя тэлефоны і старайцеся не адыходзіць далёка ад знаёмых маршрутаў, – адзначылі прадстаўнікі службы «101».