Слонім. Зладжанасць дзеянняў і гатоўнасць да надзвычайных сітуацый

Бяспека стратэгічна важных прамысловых аб'ектаў раёна знаходзіцца пад пільным кантролем выратавальнікаў. На тэрыторыі адкрытага акцыянернага таварыства «Дварэцкі iльнозавод» прайшлі тактыка-спецыяльныя вучэнні. Іх галоўнай мэтай стала дэталёвая праверка гатоўнасці дзяжурнага персаналу прадпрыемства да дзеянняў пры ўзнікненні надзвычайнай сітуацыі, а таксама практычная трэніроўка асабовага складу Слонімскага раённага аддзела па надзвычайных сітуацыях пры тушэнні пажару і правядзенні выратавальных работ.

Па тактычнай задуме ўзгаранне ўзнікла пад навесам. Сітуацыя ўскладнялася спецыфікай захоўвання сыравіны, здольнай імгненна запальвацца і распаўсюджваць агонь на велізарныя плошчы. Першымі ў барацьбу з умоўнай стыхіяй уступілі члены пажарнай дружыны прадпрыемства. Аднак іх першапачатковыя спробы самастойна лакалізаваць і ліквідаваць пажар поспеху не мелі. Моцнае «палымянае гарэнне» стварыла рэальную пагрозу для захавання астатняга ўраджаю лёну, што запатрабавала неадкладнага ўмяшання прафесіяналаў.

На месца здарэння аператыўна прыбылі сілы Слонімскага гарнізона МНС. Для ліквідацыі пажару былі задзейнічаны тры пажарных аварыйнавыратавальных падраздзяленні на чатырох аўтацыстэрнах. Каб не дапусціць знішчэння стратэгічных запасаў сыравіны, выратавальнікі неадкладна падалі на абарону сумежных секцый пераносныя лафетные ствалы, стварыўшы надзейны вадзяны бар'ер на шляху агню. Дзякуючы зладжаным і высокапрафесійным дзеянням пажарных умоўнае ўзгаранне было лакалізавана і ліквідавана ў самы кароткі час.

Па завяршэнні практычнай часткі начальнік Слонімскага раённага аддзела па надзвычайных сітуацыях Яўген Жамойдзік, дэталёва разабраў кожны этап вучэнняў. Ен даў ацэнку дзеянням усіх удзельнікаў, адзначыўшы высокі ўзровень узаемадзеяння паміж дзяжурнымі службамі завода і падраздзяленнямі МНС.