Гродна. Дашкольнікі асвойваюць правілы бяспекі гуляючы

Навучанне дзяцей асновам бяспекі – адна з галоўных задач выратавальнікаў. У гэтым пытанні асаблівы падыход патрэбны да самых маленькіх: лекцыі і сухія размовы тут не працуюць. Таму спецыялісты МНС шукаюць крэатыўныя падыходы і праводзяць інтэрактыўныя заняткі ў гульнявой форме.

У рамках акцыі «Бяспечныя канікулы» работнікі Гродзенскага гарадскога аддзела МНС правялі мерапрыемствы для выхаванцаў дзіцячых садоў № 34, 46 і 68 абласнога цэнтра.

Для малых заняткі будаваліся, як займальныя прыгоды: з дапамогай яркіх картак, якія развіваюць логіку, і тэматычных гульняў. Дзеці не проста слухалі, а самі станавіліся актыўнымі ўдзельнікамі, адказваючы на пытанні і разбіраючы сітуацыі.

Хлапчукі і дзяўчынкі вывучылі: агонь – не цацка і зразумелі, чаму запалкі і запальніцы браць нельга. Дзеці замацавалі нумары выкліку службы выратавання і патрэніраваліся паведамляць аб здарэнні, навучыліся паводзіць сябе пры пажары і запомнілі, што галоўнае правіла ў выпадку пажару – як можна скарэй выйсці на вуліцу і паведаміць дарослым.

Пазнаёміліся дашкаляты і з працай выратавальнікаў. Дзеці з захапленнем глядзелі, як пажарныя апранаюць баявое адзенне і каскі, і самі змаглі прымерыць экіпіроўку. Прадстаўнікі выратавальнага ведамства адкрылі адсекі пажарных аўтамабіляў, паказалі спецабсталяванне і амуніцыю, растлумачылі іх прызначэнне, а падача вады з рукава стала сапраўдным водным шоу!

Гэтыя мерапрыемствы пакінулі ў дзяцей яскравыя ўражанні і карысныя веды. На заканчэнне сустрэч работнікі МНС падарылі выхаванцам дашкольных устаноў адукацыі маляўнічыя памяткі і закладкі з правіламі бяспекі для замацавання матэрыялу дома з бацькамі.