Навагрудак. Бяспека грамадзян у прыярытэце

Каб нагадаць жыхарам Навагрудскага раёна аб важнасці захавання правілаў пажарнай бяспекі, выратавальнікі сумесна з карэспандэнтам газеты «Новае жыццё» адправіліся ў вёску Вялікія Карнышы Уселюбскага сельскага савета.

Пільную ўвагу ўдзельнікі рэйдавай групы ўдзялілі асобным катэгорыям, так званай «групе рызык» – людзям, якія злоўжываюць спіртнымі напоямі, шматдзетным сем'ям, інвалідам, пажылым грамадзянам, сем'ям, якія знаходзяцца ў сацыяльна небяспечным становішчы.

У сілу розных прычын гаспадары домаўладанняў не заўсёды могуць своечасова выявіць парушэнні – хто па няведанні, хто ў сілу ўзросту, а хтосьці з-за простай бестурботнасці. Падказаць, растлумачыць і дапамагчы прывесці ў пажарабяспечны стан – асноўная задача назіральных камісій.

Так, пры абследаванні жылога сектара работнікі МНС паказваюць на патэнцыйна небяспечныя моманты і даюць рэкамендацыі, як іх устараніць.

– Печ і комін неабходна тынкаваць і бяліць: калі ўтворацца нават найменшыя расколіны, на белай паверхні яны стануць прыкметнымі. Таксама своечасова чысціце коміны ад сажы, у перыяд ацяпляльнага сезона паспрабуйце рабіць не радзей за адзін раз у два месяцы. Каб вуглі, якія выпадкова выпалі з топкі, не прывялі да пажару, неабходна прыбіць перад топкай металічны ліст, памерамі не меней 50х70 см. Каб пазбегнуць перакалу, паліце печ 2-3 разы ў дзень не больш за паўтары гадзіны. Нельга тапіць печ з адчыненымі дзверцамі, ужываць для распальвання гаручыя вадкасці, а таксама выкарыстоўваць дровы, даўжыня якіх перавышае памеры топкі, – растлумачылі выратавальнікі.

Работнікі МНС настойліва рэкамендавалі гаспадарам устанавіць у жыллі аўтаномныя пажарныя апавяшчальнікі, бо менавіта гэты прыбор дапаможа выявіць пажар на ранняй стадыі яго развіцця і не дапусціць трагічных наступстваў.