МЧС Беларуси
МЧС Беларуси
Учреждение Гродненское областное управление МЧС Республики Беларусь
- Адреса и телефоны
- 230005, г. Гродно, пер. Дзержинского, д. 15
- (+375 152) 43-35-53
- (+375 152) 48-16-40
- grodno@mchs.gov.by
Навагрудак. Калі «рызыка» жыве па-суседску…
У апошні час, гартаючы зводку навін, усё часцей натыкаешся на паведамленні аб сумных наступствах, да якіх прыводзіць простая чалавечая бестурботнасць. Менавіта агонь патрабуе да сябе асаблівай увагі, нядбайнасць ў звароце з ім можа абярнуцца бядой. На сённяшні дзень на тэрыторыі Навагрудскага раёна адбылося 15 пажараў, загінулі два чалавекі. І ў аснове ўзнікнення большасці вогненных надзвычайных сітуацый па-ранейшаму ляжыць чалавечая бестурботнасць.
З мэтай папярэджання пажараў і гібелі ад іх людзей 30 сакавіка работнікі раённага аддзела па надзвычайных сітуацыях сумесна з прадстаўнікамі органаў унутраных спраў правялі прафілактычны рэйд у жылым сектары Кашалеўскага сельскага савета.
На гэты раз у цэнтры ўвагі – грамадзяне, якія злоўжываюць спіртнымі напіткамі. Акрамя таго, быў праведзены агляд жылых памяшканняў адзінокіх і адзінокапражываючых пажылых грамадзян, інвалідаў, а таксама сем'яў, якія выхоўваюць непаўналетніх дзяцей. Некаторыя з іх на асаблівым кантролі: не ўсе бацькі – выконваюць свае абавязкі ў адносінах да сваіх дзяцей.
Падчас рэйду выратавальнікі наведалі домаўладанні вяскоўцаў з мэтай выявіць магчымыя праблемныя моманты ў забеспячэнні пажарнай бяспекі жылля, нагадаць асноўныя меры па недапушчэнні ўзгаранняў, агучыць небяспечныя наступствы выпальвання сухой расліннасці і бескантрольнага развядзення вогнішчаў.
Інспектараам Навагрудскага РАНС Наталляй Фасцянковай былі старанна правераны спраўнасць пячнога абсталявання, праводка, наяўнасць аўтаномнага пажарнага апавяшчальніка. Гэтыя меры неабходныя – у сельскіх населеных пунктах печка часта з'яўляецца галоўнай крыніцай цяпла. На жаль, нярэдка менавіта яна і з'яўляецца крыніцай узгарання жылых дамоў, асабліва пры эксплуатацыі печы, якая мае відавочныя дэфекты – расколіны, разрушэнні коміна, дзверцы не зачыняюцца і г.д.
Рэйд паказаў, што ў большасці выпадкаў домаўладанні грамадзян знаходзяцца ў пажарабяспечным стане, але, на жаль, не без выключэнняў.
У вёсцы Каменка на вуліцы Цэнтральнай адзін з дамоў адразу кінуўся ўдзельнікам рэйду ў вочы. Як аказалася, першае ўражанне не падманула. У доме адчуваўся ўстойлівы пах цыгарэт, а гэта значыць, што гаспадар аддае перавагу курэнню ў доме, у яго няма жадання выйсці на вуліцу і там курыць бяспечна. Парадак у жылых памяшканнях таксама пакідае жадаць лепшага, а аўтаномны пажарны апавяшчальнік, які павінен вісець на столі, пыліцца на падаконніку ў жылым пакоі.
– Чаму ж ён дэманціраваны? – лагічнае пытанне задалі работнікі МНС.
– Дык ён пішчаць пачаў, вось і дастаў батарэйку, каб сціх, – адказаў мужчына.
– Тое, што ён папісквае – гэта знак, што батарэйка разрадзілася, і ўсё, што трэба, гэта яе замяніць, – патлумачыла старшы інспектар сектара прапаганды і ўзаемадзеяння з грамадскасцю Навагрудскага райаддзела МНС Наталля Фасцянкова.
– Дык навошта ён мне наогул патрэбны? – з абурэннем спытаў гаспадар.
– Па-першае, вы курыце ў доме, а самая распаўсюджаная прычына пажараў, ад якіх загінулі людзі, – неасцярожнае абыходжанне з агнём, у прыватнасці, пры курэнні. Па-другое, давайце разам палічым, колькі электрапрыбораў ў вас застаецца ўключанымі ў сетку, калі вы кладзяцеся спаць. Як мінімум – тэлефон на зарадцы, тэлевізар, чайнік. З-за электрапрыбора таксама можа адбыцца надзвычайнае здарэнне. Небяспека начных пажараў заключаецца ў тым, што, калі чалавек спіць, ён не адчувае пахаў, уключаючы пах дыму, што можа абярнуцца сумнымі наступствамі. Пажарны апавяшчальнік рэагуе нават на невялікую канцэнтрацыю дыму і выдае гучны гук, што дапаможа выратаваць жыццё вам і вашым блізкім. Не паляніцеся і замяніце крону ў бліжэйшы час, – настойліва рэкамендавала інспектар.
– Добра, усё зразумеў, з заробку абавязкова памяняю і ўсталюю на столь, – паабяцаў мужчына.
Ідзём далей па вуліцы і заходзім у дом да адзінокага пенсіянера, які злоўжывае алкаголем. Па ўсім відаць, што гаспадар гасцей не чакаў, адразу схаваў бутэльку з гарачыльным напіткам і рэзка пачаў размаўляць з прадстаўнікамі РАНС і РАУС.
– Што правяраеце, чаго прыйшлі? Я што парушыў? – спытаў гаспадар.
Члены камісіі растлумачылі мужчыне прычыну візіту. А абследаванне домаўладання паказала, што з «захавальніцай хатняга ачага» печчу ўсё ў парадку, аднак светагукавая прылада з вывадам на фасад дома не працуе, бо абарваны провад. На пытанне, чаму АПА знаходзіцца ў такім стане, мужчына адказаў коратка: «Калі я куру ў пакоі, ён увесь час пішчыць».
На жаль, такіх абыякавых жыхароў у раёне дастаткова, таму прафілактычная работа будзе працягвацца і далей.
Выратавальнікі і міліцыянеры працуюць на папярэджанне, таму расказваюць жыхарам раёна пра важнасць любую небяспеку своечасова заўважыць і своечасова ліквідаваць. І ў гэтай рабоце важна разуменне самога чалавека і цесная работа ўсіх службаў. Іх задача – абследаваць ўмовы пражывання чалавека, і, калі маюцца праблемы з бяспечным пражываннем, паказаць пра гэта ўласніку і дамагчыся ліквідацыі.
В. ПІСАР, «Новае жыцце»
Будь готов
Другие новости
